Jaguar kthen në vitin 2021 modelin e para 70 viteve

Jaguar kthen në vitin 2021 modelin e para 70 viteve

Marka britanike Jaguar rikthehet të prodhojë makinën e saj klasike C-Type.

Jaguar C-Type është një nga makinat më të lavdishme të kësaj marke, që debutoi në vitin 1951 dhe fitoi po atë vit garën e famshme të La Manshit.

Përgjatë viteve u prodhuan 53 Jaguar C-Type.

Çmimi i makinës së këtij viti nuk dihet, por në ankand, një mjet i tillë është shitur rreth 1,5 milionë euro.

Për herë të parë prodhohet bateria e veturave elektrike që mbushet për 5 minuta

Për herë të parë prodhohet bateria e veturave elektrike që mbushet për 5 minuta

Janë prodhuar për herë të parë bateritë për vetura elektrike që mbushen plotësisht për vetëm pesë minuta. Kjo arritje po vlerësohet si hap i madh drejt synimit që veturat elektrike në të ardhmen të mbushen aq shpejt sa veturat me naftë ose benzinë.

Veturat elektrike janë pjesë jetike e masave kundër krizës klimatike, por harxhimi i baterisë është shqetësim për vozitësit. Bateritë e reja jon-litium u zhvilluan nga kompania izraelite “StoreDot” dhe u prodhuan nga kompania “Eve Energy” në Kinë në linjat standarde të prodhimit.

Kompania izraelite tashmë e ka dëshmuar veten përmes prodhimit të baterive që mbushen shumë shpejt të telefonave, dronave, skuterëve, ndërsa 1.000 bateritë e prodhuara tani pritet ta dëshmojnë teknologjinë e saj te prodhuesit e veturave.

Në këtë kompani kanë investuar gjigantët “Daimler”, “BP”, “Samsung” dhe “TDK” dhe deri tani ka arritur të grumbullojë 130 milionë dollarë, shkruan The Guardian.

Bateritë e reja mund të mbushen për vetëm pesë minuta, por për to nevojiten mbushës shumë më të fuqishëm sesa ata që përdoren sot. Duke përdorur infrastrukturë në dispozicion, kompania “StoreDot” synon që me një mbushje 5-minutëshe të baterisë të ofrojë 160 kilometra vozitje nga viti 2025.

Raport i 24 orëve për mirëmbajtjen e rrugëve në Kosovë

Raport i 24 orëve për mirëmbajtjen e rrugëve në Kosovë sipas Ministrisë së Infrastrukturës;

Prishtinë,
18 janar 2021​

Mirëmbajtja dimërore e auto-udhëve, rrugëve nacionale e atyre rajonale po vazhdon me intensitet të shtuar.

Bazuar në raportin ditor të ditës së sotme, Ministria e Infrastrukturës informon si në vijim:

Në auto-udhën R6 Doganaj-Hani i Elezit, për shkak të reshjeve të borës dhe temperaturave nën zero (-10) u intervenua me kripë dhe pastrim të borës si preventivë për parandalim të krijimit të ngricave në shtresat qarkulluese.

Ndërsa intervenime me kripë kishte  në të dy drejtimet : Suharekë Morinë  dhe Suharekë – Gjurgjicë.

Gjithashtu në Gjilani 2, të gjitha rrugët janë në gjendje të mirë, është intervenuar me kripë.

Në regjioni Peja 1 temperaturat janë mjaft të ulëta dhe ka ngrica, bëhet shpërndarja e kripës në të gjitha rrugët. Duhet cekur se në rrugën Kuqishtë-Bogë ka vështirësi në pastrimin e borës dhe shpërndarjen e kripës për shkak të parkimit të veturave në shiritin qarkullues. Të gjitha rrugët janë të kalueshme.  

Për shkak të reshjeve të borës  temperaturave nën zero (-10) u intervenua me kripë e rërë dhe në pastrim të borës,  në mbrëmje e në mesnatë dhe ne orët e mëngjesit  në të gjitha rrugët e regjionit Prishtina 1 si preventivë për parandalim të krijimit të ngricave në shtresat qarkulluese.

Gjakova 2, Prishtina 2,  Peja 2, Ferizaj 1,  s’ka intervenime sepse gjendja e rrugëve është e mirë.

Gjakova 1, në këtë rajon ka pasur intervenime në akset rrugore ku ka pasur ujë në rrugë, po ashtu është hedhur kripë dhe zhavorr. Të gjitha rrugët kanë qenë të kalueshme dhe pa ngrica.

Prizreni 2, për shkak të temperaturave  të ulëta është intervenuar në shpërndarjen e kripës në të gjitha rrugët: Prizren –Morinë , Prizren – Prevalle, Zhur -Dragash- Restelicë, Dragash – Brod, ndërsa bora është pastruar në rrugët, Prizren –Prevallë, Dragash – Brod dhe  Dragash – Restelicë. Rrugët janë të hapura për qarkullimi.

Ministria e Infrastrukturës bën apel për kujdes të shtuar në komunikacion, njëkohësisht mbetet e përkushtuar maksimalisht në zhvillimin normal të komunikacionit dhe minimizimin e vështirësive eventuale.

Kërkohet heqja e kushtëzimit për regjistrimin e veturave në Kosovë

Ka disa vite që për regjistrimin e veturave, qytetarët e Kosovës duhet të paguajnë tatimin në pronë dhe shërbimet tjera komunale.

Deri para shfaqjes së pandemisë COVID-19, sipas të dhënave të Ministrisë së Brendshme, ishin 150 mijë vetura të paregjistruara. Por pandemia ka ndikuar që të rritet dukshëm ky numër.

Ministri i Punëve të Brendshme dhe Administratës Publike, ka pranuar se numri i veturave të paregjistruara është në rritje. Ai ka thënë se për t’u liruar qytetarët nga kushtëzimet për regjistrim, duhet bëhen ndryshime ligjore.

“Po është fakt se një numër i madh i veturave në Republikën e Kosovës janë të paregjistruara. Numri është rritur, në fakt edhe gjatë kohës së pandemisë, mirëpo rritja e këtij numri bëhet fjalë për veturat që bëjnë regjistrime të rregullta, që për shkaqe dhe arsye të njohura, kanë mbetur edhe një numër i caktuar.

Për sa i takon numrit të mjeteve të paregjistruara si kontigjencë për gjatë viteve, ne me Bankën Qendrore të Kosovës dhe me kompanitë e sigurimeve, kemi filluar hartimin e një udhëzimi administrative, me të cilin do ta rregullojmë këtë çështje dhe në momentin e parë që na krijohen kushtet dhe rrethanat do ta procedojmë”, ka thënë mnistri për KosovaPress.

Ai po ashtu ka thënë se për veturat që kanë mbetur pa u regjistruar për shkaqe të pandemisë, MPBAP-ja po vepron me vendime të herë pas hershme, derisa shton se çështja e pagesave është e rregulluar me udhëzime administrative.

“Kur po ka vështirësi po e zgjasim afatin e regjistrimit. Nga një herë ka edhe mungesë për tabelat për shkak të furnizimit jo të mirë me tabela. Nga një herë janë arsye të tjera, mirëpo, ne po veprojmë në kushte të pandemisë me vendime të veçanta në mënyrë që ta rregullojmë këtë çështje.

Çështja e pagesave është rregulluar me udhëzime të ndryshme, me ligje. Kështu që ne ndonjë rregull mund ta përjashtojmë, por pa ndryshime ligjore ne nuk mund të bëjmë më tepër”, thotë ai.

Derisa, ministri i Infrastrukturës, i kontaktuar nga KosovaPress, ka thënë se asnjë prej këtyre kushtëzimeve për regjistrim, nuk janë në kompetencën e kësaj ministrie. Drejtori i Shoqatës së Sigurimeve të Kosovës, thotë se sipas ligjeve në fuqi, respektivisht Ligjit për Tatimin në Pronën e Paluajtshme, është përcaktuar mënyrat e mbledhjes së detyrueshme të tatimit në pronë të cilat mund të ushtrohen nga organet kompetente.

Ai ka marrë në vlerësim numrin e tërësishëm të mjeteve motorike të siguruara dhe ka konstatuar se rreth 350 mijë qytetarë janë të kushtëzuar në procesin e regjistrimit të mjetit të tyre motorik.

Drejtori i Shoqatës së Sigurimeve bëri me dije se me datë 24.06.2019 kanë paraqitur ankesë në institucionin e Avokatit të Popullit lidhur me shkeljen e të drejtave dhe lirive themelore të njeriut apo keqpërdorim nga autoritetet publike dhe lidhur me këtë.